Գիտաուսումնական կենտրոն

Ուսումնական գործընթաց

Գիտաուսումնական կենտրոնը ՀՀ ազգային անվտանգության մարմինների համար կադրերի պատրաստման ժամանակակից գիտակրթական հաստատություն է, որտեղ մասնագիտական կրթություն և վերապատրաստում են անցնում ՀՀ ԱԱԾ սպայական, ենթասպայական և շարքային կազմերի ծառայողները։

Ուսումնական գործընթացը կազմակերպվում է ժամանակակից կրթական տեխնոլոգիաների կիրառմամբ՝ ներառելով տեսանյութեր, սխեմատիկ և գրաֆիկական ներկայացումներ, ինչպես նաև հակահետախուզական և օպերատիվ-հետախուզական գործունեության մեթոդաբանությունն ու առանձնահատկությունները լուսաբանող մասնագիտական ուսումնական ֆիլմեր։ Ուսումնական լսարանները հագեցած են ժամանակակից տեխնիկական միջոցներով, իսկ ունկնդիրների տրամադրության տակ են մշտապես համալրվող գրադարանային ֆոնդերն ու ընթերցասրահը։

Կարևոր տեղ է հատկացվում նաև արտալսարանային ուսուցմանը։ Կենտրոնում պարբերաբար կազմակերպվում են հանդիպումներ և դասախոսություններ, որոնց ընթացքում Հանրապետության առաջատար բուհերի մասնագետները Ծառայության անձնակազմի հետ քննարկում են աշխարհաքաղաքական զարգացումները և Հայաստանի համար արդիական նշանակություն ունեցող թեմաներ։

Ուսումնական ծրագրերն ընդգրկում են ազգային անվտանգության ապահովման հիմնական ուղղությունները՝ հակահետախուզություն, ռազմական հակահե­տա­խու­զություն, պետական սահմանի պահպանություն, հանցավորության դեմ պայքար, ինչպես նաև՝ ազգային անվտանգության ապահովման հիմնահարցեր, տնտեսական և տեղեկատվական անվտանգություն, միջազգային ահաբեկչության, թմրամիջոցների ապօրինի շրջանառության, քրեական ենթա­մշակույթի և կազմակերպված հանցավորության դեմ պայքար, մասնագիտական այլ արդիական ոլորտներ։ Այս ուղղություններով իրականացվում է տեսական գիտելիքների և գործնական հմտությունների համալիր ուսուցում։

Գիտելիքների գնահատման և ստուգման գործընթացում ներդրված է թվային տեխնոլոգիաների վրա հիմնված թեստավորման համակարգ, որն ապահովում է ուսումնական արդյունքների գնահատման ժամանակակից և օբյեկտիվ մոտեցում։

Ուսումնական գործընթացի շարունակական կատարելագործման և արդիա­կանացման նպատակով ՀՀ ԱԱԾ ղեկավարության որոշմամբ 2025 թվականից ներդրվել է մասնագիտական կադրերի պատրաստման նոր մոդել։ Այն միտված է ուսուցման անհատականացմանը, ունկնդիրների ներգրավվածության և մոտիվացիայի բարձ­րացմանը՝ տեսական գիտելիքների և գործնական հմտությունների արդյունավետ համադրման միջոցով։ 2024 թվականից Կենտրոնում գործում է «Սահմանապահ ծառայության» ամբիոնը, որն իրականացնում է ՀՀ ԱԱԾ սահմանապահ զորքերի զինծառայողների մասնագիտական պատրաստման և վերապատրաստման ծրագրեր։ Ամբիոնի գործունեության կարևոր ուղղություններից են միջազգային համագործակցության զարգացումը և գործընկեր երկրների հետ մասնագիտական փորձի փոխանակումը։Ուսումնական գործընթացի արդյունավետության բարձրացման և շարու­նա­կականության ապահովման նպատակով ներդրվել են նաև համակարգչային տեխնոլոգիաների վրա հիմնված ուսուցման հնարավորություններ։ Դրանք ՀՀ ԱԱԾ աշխատակիցներին թույլ են տալիս, առանց ծառայությունից կտրվելու, մասնակցել ուսումնական ծրագրերին և օգտվել ուսումնական նյութերի էլեկտրոնային արխիվից։