Գիտաուսումնական կենտրոն
Համագործակցություն
Ազգային անվտանգության ապահովման ոլորտում գիտական հետազոտությունների զարգացման, գիտակրթական ներուժի արդյունավետ օգտագործման և աշխատակիցների մասնագիտական ու գիտական կարողությունների շարունակական կատարելագործման նպատակով Գիտաուսումնական կենտրոնը համագործակցում է Հայաստանի Հանրապետության առաջատար գիտակրթական հաստատությունների հետ։
Համագործակցությունն ուղղված է գիտակրթական ոլորտում կուտակված փորձի և գիտելիքի փոխանակմանը, գիտական ներուժի համախմբմանը, համատեղ հետազոտությունների իրականացմանը, ինչպես նաև ազգային անվտանգության ոլորտի համար բարձր որակավորում ունեցող մասնագետների պատրաստմանն ու վերապատրաստմանը։
Համագործակցության հիմնական ուղղություններն են՝
ազգային անվտանգությանն առնչվող հարցերի ուսումնասիրություն, նյութերի վերլուծություն և համատեղ գիտական հետազոտությունների իրականացում,
թեմատիկ լսումների, սեմինարների, գիտագործնական միջոցառումների և աշխատանքային քննարկումների կազմակերպում,
գիտական և մասնագիտական գրականության, հետազոտական արդյունքների ու փորձի փոխանակում,
գործընկեր գիտակրթական հաստատությունների գիտաշխատողների և մասնագետների ներգրավում Կենտրոնի ուսումնական գործընթացում, ինչպես նաև Կենտրոնի մասնագետների մասնակցություն գործընկեր հաստատությունների կրթական ծրագրերին,
Կենտրոնի աշխատակիցներին մեթոդական և կազմակերպչական աջակցության տրամադրում՝ դոկտորանտուրայում ուսումնառության, ատենախոսությունների մշակման և պաշտպանության գործընթացներում,
ազգային անվտանգության ոլորտի մասնագիտական ներուժի զարգացմանն ու բարձր որակավորում ունեցող կադրերի պատրաստմանն ուղղված համատեղ ծրագրերի իրականացում։
Գիտակրթական համագործակցության զարգացման շրջանակում 2021-2024 թվականներին համագործակցության հուշագրեր են ստորագրվել Երևանի պետական համալսարանի իրավագիտության և արևելագիտության ֆակուլտետների, ՀՀ ՆԳՆ կրթահամալիրի և ՀՀ ԳԱԱ արևելագիտության ինստիտուտի հետ։ Ձևավորված գործընկերության շրջանակում իրականացվող աշխատանքները նպաստում են գիտակրթական փորձի փոխանակմանը, մասնագետների ներգրավմամբ ուսումնական գործընթացի հարստացմանը և Կենտրոնի աշխատակիցների մասնագիտական ու գիտական առաջընթացին։
Գիտակրթական գործընկերության ընդլայնմանն ուղղված կարևոր քայլ է 2026 թվականի նոյեմբերի 5-ին ՀՀ ԱԱԾ գիտաուսումնական կենտրոնի և Երևանի պետական համալսարանի միջև ստորագրված համագործակցության հուշագիրը։ Այն նոր հնարավորություններ է ստեղծում ազգային անվտանգության հիմնահարցերի վերաբերյալ համատեղ հետազոտությունների, մասնագետների պատրաստման և վերապատրաստման, ինչպես նաև գիտակրթական ներուժի առավել արդյունավետ օգտագործման համար։
Համագործակցության նոր ուղղություններից է ժամանակակից տեխնոլոգիաների, մասնավորապես՝ արհեստական բանականության հնարավորությունների և կիրառության վերաբերյալ գիտելիքների զարգացումը։ Այս նպատակով նախատեսվում է ԵՊՀ մասնագետների ներգրավմամբ ՀՀ ԱԱԾ աշխատակիցների համար մասնագիտական վերապատրաստման դասընթացների կազմակերպում։
Գիտակրթական հաստատությունների հետ գործընկերային հարաբերությունների շարունակական զարգացումը Կենտրոնը դիտարկում է որպես ազգային անվտանգության ոլորտում գիտական հետազոտությունների խթանման, մասնագիտական ներուժի ամրապնդման, նոր գիտելիքների ու տեխնոլոգիական լուծումների ներդրման և կրթական գործընթացի կատարելագործման կարևոր ուղղություն։